COworkids jarduerak
Haurrak eta nerabeak dira COworkidsen erdigunea. Haurren eskubideak oinarri dituen programaren hezkuntza-prozesuan parte hartzeak tresnak emanen dizkie beren auzoetan eragile aktiboak izateko. Gaitasun sozial horiekin, beren begirada gehituko dute, eta beren interesak eta beharrak hirira eramanen dituzte.
COworkidsek hiritar aktibo gisa duten rolaz kontziente izatea sustatuko du, hiruhilekoko programazioen bidez. Programazio horiek, askotarikoak eta integralak, Haurrentzako Partaidetza Kontseiluko kide aktibo izateko bidea izanen dira.
Astelehenetik ostegunera bitarteko jarduerak
Astelehenetik ostegunera egutegi egonkorra proposatuko da, doan, auzo bakoitzean, eskola-laguntzarekin, sormen-laborategiarekin, joko anitzekin eta kirol anitzekin. Eguneroko jarduera horietako bakoitzean giza eskubideak landuko dira, metodologia parte-hartzaileen bidez, Haurren Eskubideen Konbentzioa izanen delarik eguneroko programazioaren ardatza.
Auzo bakoitzeko programazio egonkor horren barruan, COworkidsek bi jarduera nabarmentzen ditu:
– Xakea, haur eta nerabeengan erantzukizun-zentzua eta erabakiak hartzeko, arazoak konpontzeko eta planifikatzeko gaitasuna sustatzen duen hezkuntza-tresna gisa. Nafarroako Xake Federazioaren laguntzarekin, COworkidsek auzo bakoitzean xakea praktikatzea proposatzen du, astean behin, gaztelaniaz eta euskaraz.
– Saskibaloia, berdinen arteko elkartasuna garatzeko bide gisa, enpatia eta talde-lana sustatzeko eta komunikatzeko gaitasunak hobetzeko. Nafarroako Saskibaloi Federazioaren laguntzarekin, astero lan eginen da, eta auzoen arteko topaketak antolatuko dira, integrazioa eta elkartrukea sustatzeko.
Beste jarduera batzuk
Auzo bakoitzeko programazio egonkor hori hiri osoko neska-mutil eta nerabeei zabalik dauden jarduerekin osatuko da, haur eta nerabe guztiendako eskuragarriak eta irisgarriak direla bermatuta. Azpimarratzekoak dira, besteak beste, pilota Labrit pilotalekuan; piraguismoa Iruñeko Piraguismo Klubean, eta musika eta dantza hainbat estilotan, Street Dance delakoan kasu, hartara Gaztediaren Etxeko jarduerak hiriko auzo guztietara eramanez.
Deskargatu COworkids programazioa zure auzoan:
Izena eman nahi baduzu, edo informazio gehiago jaso nahi izanez gero, idatzi hona: coworkids@pamplona.es